KI KSUID
Ki ksuid ki long kito ki angel kiba ialeh pyrshah ia u Blei ryngkat bad u Luciphar uba la tip kum u Soitan (kaba mut u nongialeh pyrshah) u bsein tymmen, u nongpynshoi u ba sniew tam, u nongsynshar jong kane ka pyrthei u blei jong kane ka juk, u nongpyniap bad u kpa jong ka lamler (Isa.14:12-15; Ese.28:12-19, Ioan. 12:31; 2Kor. 4:4; Math. 4:3; 1Ioan. 5:19; Ioan. 8:44). Namarkata kine ki ksuid ki long ruh ba la kdew kum “ki angel ki bym shym la ri ia kata ka burom tymrai jong ki hi” (Judah 6). Ki long ki angel ba la hap noh. Ki ialeh pyrshah ia ka kam u Blei (1Thes.2:18). Kiba shukor ia ka jaid bynriew (Jing.20:7-80). Kiba sarong (1Thi.3:6). Ki nongpynshoi ia ka jaid bynriew (Eph.2:2). Kiba sniew (1Pet.5:8), kiba thmu da ka ba sniew (Job 2:2). Ki nongbanbein jong ka jaid bynriew da ki bunjaid ki jing jynjar ki jaid jingpang bad ki jingpang ba bun jaid (Ki Kam 10:38; Mark 9:25). Ki rung ha ki met jong ki briew ki bym don ka jingngeit ha u Jisu (Math.8:16). Ki lah ban rung hapoh u briew (Lk.22:3). Ki lah ban pynphai ia ka jingpyrkhat jong u briew (Ki Kam 5:3). Ki lah ban rung wat hapoh ki met jong ki mrad (Lk. 8:33). U Soitan um lah ban leh donbor ne ban rung ha ka met jong ki ba ngeit namar ka met jong ki ka long ka їng shong jong u mynsiem bakhuid te ym don jaka ia u Soitan (1Kor. 6:19; 1Kor.10:21). Ki ksuid ki ngeit bad ki sngew kuih hakhmat u Blei (Jakob 2:19). U Soitan bad ki angel jong u ki iai ap ia ka sngi jingbishar jong u Blei (Math. 8:29; Rev. 20:10). Ia kiba ngeit jong u Jisu Khrist la khot ban pynkohnguh ia lade ha u Blei bad ban ialeh pyrshah ia u Soitan (Jakob 4:7). Kawei ka dak jong ki ba ngeit ka long ban beh ia ki ksuid ha ka kyrteng u Jisu (Mark 16:17).
1. U Jisu Khrist u la aibor ha kiba ngeit ban beh ia ki ksuid (Math.10:1,8; Mark 16:17). Ka tynrai jong kane ka bor ka long tang ha u Khrist.
2. U Jisu Khrist u la beh ia ksuid da u mynsiem jong u Blei (Math 12:28); namarkata, uba ngeit u donkam ia ka jingpyndap jong u mynsiem bakhuid (Gal. 5:25).
3. Ka jingduwai, ka jingshahjingit bad ka jingaiti lut jong ka jingim sha u Blei ka long kaba donkam haduh katta katta (Mk. 9:29; Jakob 4:7).
4. Kiba ngeit ki dei ban wad ia ka jingai ban nang ban pyniapher ia ki mynsiem (1Kor. 12:10).
5. Ym donkam ban ia kren bad ki ksuid (Mk.1:24). Ki long ki nongshukor.
6. Uba ngeit u donkam ban beh ia ki ha ka kyrteng u Jisu (Ki Kam 16:18).
7. Wat khap ia ki khmat jong phi haba phi beh ia ki ksuid, phi hukum ia ki, phim shym duwai, teng teng ngi iohi ba ki ksuid ki long ki ba khlain ha ka bor met jong ki (Math.17:15; Ki Kam 19:15,16).
8. Uba ngeit um donkam ba ai jaka ia u ksuid ban pyntlot ia ka jingngeit jong u ha u Blei, ha ka ktien jong u, bad ha ka bor ka jong u mynsiem bakhuid kaba ha u Khrist. Dei ban pyndem shisyndon ia ki bor ki jong u Soitan (Jen.3:1; Math. 4:3-10).
9. Ha man ba ngi iaseng lang ngi don kam ia ka jingiasngew thuh lang hapdeng ki shakri jong u Blei. Ai ba untei un shakri katkum ka jingpynsleh, jingaibor u Blei. Katba kiwei to ai ban kin duwai na ka jong u ne jong ka (1Kor.14:33).
10. Baroh ki kynja kuboit ki jingleh jadu, ki jingleh byrtong, ki kynja tiar babuhrieh dei ban weng shisyndon ba ka jingpynkoit ka lah ban shim jaka. Ka jingdon jong kine kiei kiei ka pynlong ka lad iaki bor u Soitan ban leh Trai khlieh ne leh dorbor (Ki Kam 19:19).
11. Haba la ioh lait dei ban phla bad ban kylla kaba mut, ban ngeit bad ban long ba la dap da u mynsiem bakhuid, khnang ban lait noh na u Soitan ioh un wanphai kylla biang (Matt.12:44,45). Ban im ka jingim ka bakhuid bad ban aiti ialade ha ka mon jong u Blei (1Ioan.5:18).
© Thermudis Marbaniang, 2010
