U BRIEW
U Blei u la thaw ia u briew ha ka sngi kaba hynriew u la thaw shynrang bad kynthei u la thaw ha ka dur ka jong u Blei hi (Jen. 1:26-28). Ki la long ha ka burom bad ka jingiaroh jong u Blei bad u la aibor ha ki halor ki jingthaw baroh (Ps.8:5; Jen.1:28). U Blei u la thaw ia u briew ha ka dur met, dur briew bad dur mynsiem baim, kumta u briew u la long ka met ka jingim bad ka mynsiem (Jen.2:7; Job 32:8; Ekkl.11:5; 12:7; 1Thess.5:23). U briew u banynkong u Adam u la leh pop bad lyngba kane la wallam ia ka pop bad ka jingiap sha ka pyrthei (Rom.5:12). Ka Baibl ka iathuh ia ngi ba ha u Adam baroh ki la leh pop, namar kata ka jingiap ka la wan sha ki briew baroh (Rom.5:12). Kane ka jingiap ka la long lai syrtap ha ka dur: (1) ka jingiap ba kynja mynsiem (Ka jingiakhlad bad ka jingshun da u Blei), (2) Ka jingiap ba kynja doh (Ka jingiakhlad ka mynsiem na ka doh ne na ka met ), (3) bad ka jingiap kaba ar (Ka jingpynshitom bymjukut ha dujok (Eph.2:1; Kol.1:21; Rom.5:10; Jing.21:8). U briew u la kylla iap lyngba ka jingpynrem jong ka pop.
Ka Baibl ka iathuh ba “Ka doh bad ka snam” lane ka jing bympynthymmai ia ka jingim “kam lah ban ioh leit sha ka hima jong u Blei” namar kaba pyut kam lah ban ioh ia ka bympyut (1Kor.15:50). Namarkata, ka long tang kawei ka lynti jong ka jingpynim ka long lyngba ka jingpynthymmai da u mynsiem da ka jingngeit (Ioan.3:5,6). Haba ngi la iohpdiang ia ka jingim ha u Jisu Khrist, ngi la ioh lait na ka jingpynrem jong ka jingim ka barim ba ngi la kylla long ki nonghairpateng jong ka hima jong u Blei ka ban sa wan lyngba u Jisu Khrist. Katba kiwei ki la hap ha ka jingpyniaid jong u blei jong kane ka pyrthei uba long u Soitan (2Kor.4:4; Eph.2:2; 1Ioan.5:19).
© Thermudis Marbaniang, 2010
